我係一隻環保嘅企鵝（上）
　　
受溫室效應影響，2014年開始，南極海冰嘅面積，...

我係一隻環保嘅企鵝（上）
　　
受溫室效應影響，2014年開始，南極海冰嘅面積，降到了有記錄以來嚟最低值。

南極冰層嘅減少，令企鵝嘅家園面積銳減，生活環境同食物多樣性受到破壞，直接威脅企鵝嘅生存。

冇錯，直接威脅我哋嘅生存！
　　

我叫企鵝王，其實企鵝世界冇君主制度，只係每一種動物，經過無數嘅巧合加長期嘅修練，都有機會成精。

我就係有百年道行，法力最高強嘅企鵝精，所以被其他企鵝尊稱為「企鵝王」，有咩難題都會嚟搵我幫手。

溫室效應、全球暖化，的確係企鵝逼在眉睫嘅危機。
　　

我心急如焚，我雖然有百年道行，但最多都係用吓「點水成冰」嘅法術，始終係杯水車薪，南極愈嚟愈熱。

我收集咗好多資料，知道溫室效應，好大程度上係因為人類唔環保嘅生活方式。

所以，當我可以幻化成人形後，我就決定去人類社會度生活，推廣環保理念，唔好累到企鵝咁慘。
　　

臨走前我發表講話：「我肩負住企鵝族嘅重擔離開，一日未成功，我就唔返嚟。終有一日，成個南極會都凍番，到處都係冰，大家開開心心捉魚食，就好似以前咁。」

所有企鵝齊聲歡呼：「企鵝王一定得！」

冇錯，企鵝王一定得。

雖然我變到人形，但仲有千千萬萬隻企鵝喺南極捱緊苦。
　　

我離開南極後，初時都四處碰壁，好彩我有少少法術傍身，每次都化險為夷，仲畀我搞到人類社會嘅合法身份。

我漸漸了解人類社會嘅習性，我知道人類有好多唔環保嘅習慣，買嘢會用膠袋、成日開冷氣……一切一切，積少成多，都加速咗溫室效應。

我成立咗一個叫「企鵝之友」嘅環保組織，話係組織，其實初時得我一個。

咁都唔緊要，我一邊上網做宣傳，仲日日喺街派傳單，宣揚溫室效應對企鵝嘅傷害，同埋環保嘅重要性。
　　

做咗幾個月，街坊都開始認得我，仲有幾個熱心嘅年青人，主動嚟幫手做義工。

我嘅生活都好符合環保原則，我從來唔用膠袋，亦唔會用即棄餐具。

漸漸地，開始有媒體留意到我，訪問我。

大家都讚我知行合一，唔似某啲環保人士咁，口講環保，生活上就為咗自己嘅方便，做埋晒啲唔環保嘅嘢。
　　

好多人都問：「你點解咁鍾意企鵝，肯為企鵝付出咁多嘅？」

因為我就係企鵝！

我當然唔會咁答，我會話：「企鵝係人類嘅好朋友，就算你唔愛佢，都唔應該破壞佢嘅家園。」

再配上幾張可愛企鵝相，唔少女仔都因為咁，成為咗「企鵝之友」嘅支持者，決定為環保盡一分力。
　　

雖然，我嘅影響力只係局限喺一個小小嘅城市中，甚至連呢個城市嘅人都未影響晒，根本唔足以改變個氣候。

但我相信「千里之行，始於足下」，好似我當從南極踏出咗第一步，去到人類世界，從零開始咁。

終有一日，我會成為人類社會舉足輕重嘅環保代表，令更多人類為環保出力。
　　
下集：https://bit.ly/39Y32Q8
　　
Patreon訂閱即時睇下集，快人一步：https://www.patreon.com/tomato28
　　
#短故 #短篇 #小說 #陳美濤 #廣東話 #粵語 #tomatochan #我係一隻環保嘅企鵝

---